|
GLYNEBWY I GYNNAL PERFFORMIAD CYNTAF BLACK WATCH, SEF DRAMA SYDD WEDI CIPIO GWOBRAU |
Caiff y perfformiad cyntaf o’r ddrama Black Watch gan Theatr Genedlaethol yr Alban sydd wedi cael canmoliaeth ar draws y byd ac wedi ennill gwobrau, ei gynnal yng Nghanolfan Hamdden Glynebwy fis nesaf.Mae’r ddrama sy’n sôn am Gatrawd o’r Alban ac am fywydau ei milwyr yn Irac wedi cael adolygiadau gwych ym mhob man lle mae wedi’i llwyfannu a chafodd ei hethol yn ddigwyddiad gorau’r theatr yn 2007 gan feirniaid Americanaidd pan aeth ar daith o’r Unol Daleithiau y llynedd. Daeth y ddrama i Gymru drwy gymorth rhaglen adfywio Blaenau’r Cymoedd a Glynebwy fydd yr unig le yng Nghymru iddi gael ei pherfformio ynddo yn ystod ei thaith bresennol o’r DU. Mae cefnogi a hyrwyddo’r celfyddydau, etifeddiaeth a thwristiaeth yn rhan annatod o raglen Blaenau’r Cymoedd, sy’n mynd i’r afael ag adfywio ffisegol a chymunedol fel ei gilydd gyda’r nod o wella ansawdd bywyd. Mae denu perfformiad o safon fyd-eang fel Black Watch i Lynebwy yn cael ei ystyried yn dipyn o gamp a dywedodd y Dirprwy Weinidog dros Adfywio Leighton Andrews, ei fod yn gyfle amheuthun i bobl weld drama o’r radd flaenaf ar garreg eu drws, gan ddenu cynulleidfaoedd hefyd o’r tu allan i Lynebwy. “Mae’n ymwneud â newid argraffiadau a delweddau ystrydebol – mae’n dweud cyfrolau bod Glynebwy’n cynnal perfformiad cyntaf Black Watch a theatr Genedlaethol yr Alban yng Nghymru. “Mae’n dod â pherfformiad sydd wedi cael clod ar draws y byd ac sydd wedi bod ar daith yn UDA, Canada, Awstralia a Seland Newydd i Flaenau’r Cymoedd. “Mae’n galluogi pobl leol i fwynhau drama sydd wedi bod wrth fodd feirniaid ar draws y byd, a hefyd yn annog mynychwyr y theatr yng Nghymru a gorllewin Lloegr i ymweld â Glynebwy a dod i ardal Blaenau’r Cymoedd, a hynny am y tro cyntaf o bosibl, er mwyn gweld yr hyn sydd gan yr ardal i’w gynnig.” Caiff ei chefnogi dan raglen Blaenau’r Cymoedd oherwydd yr effaith eang y bydd yn ei chael ac mae’n dilyn nifer o ddigwyddiadau pwysig sydd wedi’u cynnal yn y rhanbarth. Caiff arian rhaglen Blaenau’r Cymoedd ei wario ar y lleoliad, llety’r criw a’r cast, trafnidiaeth a marchnata a fydd hefyd o fudd uniongyrchol i’r economi leol. Nid oedd Theatr Brycheiniog yn ddigon mawr i gynnal y digwyddiad yn Aberhonddu, ond mae’n cyflwyno a hyrwyddo’r digwyddiad ynghyd â Gwasanaethau Celfyddydau Blaenau Gwent a Theatrau Rhondda Cynon Taf. Cyhoeddodd y Gweinidog dros Dreftadaeth, Rhodri Glyn Thomas y llynedd y byddai Llywodraeth Cynulliad Cymru’n buddsoddi er mwyn creu Theatr Genedlaethol i Gymru a fydd yn Saesneg ei hiaith. Bydd y cwmni newydd yn gorff comisiynu yn hytrach na chael canolfan mewn un adeilad, sef patrwm tebyg i Theatr Genedlaethol yr Alban. Wrth groesawu’r ymweliad â Blaenau Gwent, meddai: “Mae llwyddiant Black Watch yn gyffrous ac yn ysbrydoliaeth ac rwy’n falch dros ben o’r ffaith mai pobl Blaenau Gwent fydd y cyntaf yng Nghymru i weld perfformiad cyntaf y ddrama hon sydd o safon ryngwladol. “Mae gennym awduron, actorion a gweithwyr proffesiynol ym myd y theatr yng Nghymru sy’n hynod o greadigol, ac yn ogystal â pherfformio yn rhwydwaith sefydledig ein theatrau a’n canolfannau celfyddydau, fy ngobaith yw y bydd y cwmni yn mynd â’i berfformiadau i ganolfannau a chymunedau er mwyn i Gymru gyfan gael elwa arnynt”. Meddai Cadeirydd Cyngor y Celfyddydau Cymru (CCC), Dai Smith: “Mae Cyngor Celfyddydau Cymru wrth ei fodd o fod wedi llwyddo i ddod â pherfformiad Theatr Genedlaethol yr Alban o Black Watch, sydd wedi cael canmoliaeth drwy’r byd, i Lynebwy fel rhan o’n gwaith trawsbynciol ar ran y celfyddydau gyda Llywodraeth Cynulliad Cymru. “Mae CCC yn falch tros ben o gael cefnogaeth y Dirprwy Weinidog dros Adfywio, Leighton Andrews, ac o gael hwyluso’r digwyddiad drwy gynllun ariannu Llywodraeth Cynulliad Cymru, sef ‘Y Celfyddydau y tu allan i Gaerdydd. Gobeithio y bydd cynulleidfaoedd wrth eu bodd â’r perfformiad ac y byddant yn disgwyl yn eiddgar am gynyrchiadau yn y dyfodol gan Theatr Genedlaethol Cymru sydd newydd gael ei sefydlu”. |
| web site: /www.nationaltheatrescotland.com/content/default.asp?page=home_showBlackwatch |
| e-mail: |
Wednesday, April 16, 2008 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999