Mae cynhyrchiad diweddaraf Cwmni’r Frân Wen sef Hawl gan Iola Ynyr bellach ar daith ac yn barod yn ennyn ymateb chwilfrydig gan y gynulleidfa. Dyma gynhyrchiad sy'n gwthio'r ffiniau o ran cysyniad a llwyfaniad ac sydd wedi ei ddatblygu i herio pobl ifanc, yn bennaf, i gwestiynu eu hawliau nhw ac eraill yn wyneb digwyddiadau rhyngwladol erchyll y byd heddiw. Caiff y gynulleidfa eu hannog i ddehongli o'r funud gyntaf wrth iddynt gael eu tywys drwy sganiwr i babell mewn lloches ffoaduriaid ar y ffin rhwng Kyrgyzstan ac Uzbekistan. Yn y babell, cyflwynir cynhyrchiad theatrig a chynhyrfus y gellir ei ddehongli ar sawl lefel. Ar un lefel, cawn ein cyflwyno i ddynameg perthynas a sut y mae un yn dylanwadu ar y llall. Ar lefel fwy dyrys, ceir mewnwelediad i sut y mae unigolion a gwledydd yn llwyddo i fanipiwleiddio a gormesu eraill er lles eu hunain. Y gobaith yw cyflyru emosiynau’r gynulleidfa gan eu hysgogi i edrych ar y byd o'r newydd. Pwy sy’n gwarchod ein hawliau? Pam fod cymaint yn amharchu hawliau eraill? Oes cyfiawnhad dros hynny pan fo sefyllfa enbyd yn ein hwynebu? A ddylem gyfyngu ar hawliau lleiafrifoedd er mwyn gwarchod buddiannau’r mwyafrif? Sut all gwledydd mwyaf pwerus y byd dorri rheolau hawliau dynol sylfaenol heb dderbyn cosb? Pam bod pobl o bob oed yn cael eu hamddifadu o’u hawliau o dan ein trwynau yng Nghymru ac yn rhyngwladol? Ai anwybodaeth neu ddifaterwch sy’n caniatáu'r anghyfiawnderau hyn? Gellir gwylio clip fidio a chael cip olwg ar luniau proffesiynol o’r cynhyrchiad ar ein gwefan trwy ddilyn y linc isod: http://www.franwen.com/cymraeg/sioe/hawl/sioe.aspx Cyflwynir Hawl gan Iwan Charles, Carys Gwilym, Elen Gwynne, Neil Williams Cyfarwyddwr: Iola Ynyr Cynllunydd Set: Gwyn Eiddior Cynllunydd Goleuo: Gwion Llwyd Cerddoriaeth: Osian Gwynedd Mae'r cynhyrchiad yn teithio ysgolion uwchradd Gwynedd, Ynys Môn a Chonwy hyd at y 7fed o Ragfyr 2010 (trwy gyfrwng y Saesneg tan 3/11/10 a thrwy gyfrwng y Gymraeg wedi hynny). Atodir ffleiar pdf sy'n nodi dyddiadau'r daith. Sylwer bod perfformiadau arbennig wedi eu trefnu ar gyfer pobl ifanc o Wynedd, Ynys Môn a Chonwy sydd ddim mewn gwaith, addysg nac hyfforddiant yn ogystal. Cynhelir perfformiad cyhoeddus o Hawl yn Neuadd JP, Bangor ar nos Fawrth, 16 Tachwedd 2010 am 8 o'r gloch (perfformiad trwy gyfrwng y Gymraeg). Dyma ymgais ar ran Cwmni’r Frân Wen i ehangu ei gynulleidfa draddodiadol a chynnal perfformiadau cymunedol. Gellir archebu tocynnau drwy anfon e-bost at post@franwen.com / 01248 715048. Rhybuddir bod nifer cynulleidfa yn gyfyngedig i 55 felly archebwch eich tocynnau nawr! Mae’r cynhyrchiad yn addas ar gyfer pobl ifanc 13 oed +. Cofiwch ymweld â gwefan newydd y cwmni www.franwen.com am wybodaeth pellach yngl_n â Hawl a chynlluniau’r cwmni ar gyfer y dyfodol. |
| Cwmnin Fran Wen web site: www.franwen.com/cymraeg/sioe/hawl/sioe.aspx |
| e-mail: |
Monday, October 18, 2010 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999