Bydd Cynulleidfaoedd Cymru yn gweithio gyda dros 200 o gyrff yn y celfyddydau – gan gynnwys theatrau, orielau, amgueddfeydd a chwmnïau teithiol – i feithrin medrau marchnata, cynnig gwybodaeth i’r cyhoedd a rhedeg rhaglenni i symbylu mwy o fynychu a chymryd rhan. Dangosodd arolwg diweddar gan Gyngor Celfyddydau Cymru, Y Celfyddydau yng Nghymru, bod 76% o boblogaeth Cymru yn mynd i ddigwyddiad yn y celfyddydau unwaith y flwyddyn neu’n amlach, ac un o bob pump yn cymryd rhan mewn gweithgaredd yn y celfyddydau. Amcan Cynulleidfaoedd Cymru ydi chwyddo’r nifer o bobol sy’n cael mwynhad o’r celfyddydau. Meddai Joanna Davies, Prif Weithredydd Cynulleidfaoedd Cymru, “Mae gwneud y celfyddydau yng Nghymru yn fwy hygyrch yn hanfodol bwysig, ac mae Cynulleidfaoedd Cymru yn barod i chwarae’i ran. A ninnau’n hunain yn fynychwyr ac yn gyfranwyr rheolaidd yn y celfyddydau, gwyddom am y manteision aruthrol sy’n deillio o wrando ar gerddoriaeth fyw, mynd i ddigwyddiad mewn theatr, darllen gwaith llên o Gymru neu gymryd rhan mewn gweithdy yn y celfyddydau. PARHAD…/ Mae yna gymaint i gael blas arno yng Nghymru, ac mae ansawdd y gwaith a gynhyrchir o safon mor uchel, mae arnom eisiau helpu pawb i’w fwynhau ac i fod yn rhan fwy ohono.” Meddai Jane Clarke, y Cyfarwyddwr Gweithrediadau yng Nghyngor Celfyddydau Cymru (CCC): “Mae CCC yn falch o fod wedi hwyluso creu Cynulleidfaoedd Cymru trwy ein rhaglen cynaladwyedd a ariannir gan y Loteri. “Cynulleidfaoedd Cymru fydd allwedd trosglwyddo ein Strategaeth Datblygu Cynulleidfaoedd ein hunain a llathen fesur llwyddiant y corff newydd yma fydd chwyddo mynychu a chymryd rhan yn y celfyddydau trwy hyd a lled cymunedau Cymru.” Sefydlwyd Cynulleidfaoedd Cymru o ganlyniad i gyfuno Marchnata Celfyddydau Caerdydd, Marchnata’r Celfyddydau yn Abertawe a Sir Gaerfyrddin a Marchnata Celfyddydau’r Cymoedd. Cefnogwyd y cwmni trwy’r broses gyfuno yn rhan o Raglen Beilot Cyngor Celfyddydau Cymru ar gyfer Cyrff Cynaladwy, a chafodd fuddsoddiad sylweddol er mwyn sicrhau ei fod yn gallu rhoi yn eu lle raglenni datblygu cynulleidfaoedd sy’n torri tir newydd a sy’n gyffrous. Cefnogir yr asiantaeth yn gadarn hefyd gan bedwar ar ddeg o awdurdodau lleol trwy hyd a lled De a Gorllewin Cymru, ac mae ganddi gynlluniau i ehangu i Ganolbarth a Gogledd Cymru yn y dyfodol agos. Bydd Cynulleidfaoedd Cymru yn cynnig cefnogaeth farchnata i gyrff yn y celfyddydau, a hefyd yn rhedeg rhaglenni gwybodaeth gyhoeddus. Lansir gwefan newydd sbon danlli cyn bo hir – www.whatsonwales.co.uk / www.galwgargymru.co.uk – fydd yn cynnig newyddion, gwybodaeth, rhestrau o ddigwyddiadau a chynigion arbennig ar ddigwyddiadau yn y celfyddydau trwy hyd a lled y wlad. |
| Cynulleidfaoedd Cymru web site: www.audienceswales.co.uk |
| Joanna Davies e-mail: joanna@audienceswales.co.uk |
Thursday, April 6, 2006 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999