|
Cynhadledd Ryngwladol ar berthynas llenyddiaeth â’r cyfryngau mewn Cenhedloedd Bychain |
12 - 13 Gorffennaf 2012Academi Hywel Teifi, Prifysgol Abertawe GALWAD AM BAPURAU Dyddiad cau ar gyfer cynigion: 1 Mawrth 2012 Gwahoddir cyflwyniadau ar gyfer cynhadledd flynyddol Cyfrwng a gynhelir gan Academi Hywel Teifi, Coleg y Celfyddydau a’r Dyniaethau, Prifysgol Abertawe, Cymru. Gwahoddwn gyflwyniadau gan academyddion, ymarferwyr y celfyddydau a’r cyfryngau, a gwneuthurwyr polisi, yn y meysydd astudiaeth canlynol: Ffilm, Teledu, Radio, Newyddiaduraeth, Cyfryngau Newydd, Theatr a Pherfformio. Bwriad Cyfrwng 2012 yw trafod y berthynas a geir rhwng llenyddiaeth a’r cyfryngau a hynny mewn Cenhedloedd Bychain. Yma yng Nghymru, ac yn enwedig yn y Gymraeg, fe geir perthynas agos rhwng ein canon llenyddol a’r cynyrchiadau dramatig a welir ar ein sgriniau a’n llwyfannau. Gobeithir yn y gynhadledd hon rannu profiadau a syniadau am y berthynas honno, ei dylanwad a’r ymateb iddi. Croesewir cynigion ar gyfer papurau, paneli trafod cyflawn, gweithdai, dangosiadau a pherfformiadau yn trafod unrhyw agwedd ar thema’r gynhadledd, gan gynnwys, er na chyfyngir ceisiadau i’r pynciau canlynol: ·Y modd yr addasir testunau llenyddol ar gyfer llwyfannau amrywiol ·Ymateb y gynulleidfa i lenyddiaeth ar amrywiol lwyfannau ·Rôl y cyfryngau wrth fagu cynulleidfaoedd newydd ar gyfer gweithiau llenyddol ·Y berthynas rhwng ieithoedd lleiafrifol a llenyddiaeth ar y llwyfan a’r sgrin ·Effaith dibyniaeth ar addasu llenyddiaeth ar feithrin syniadau creadigol newydd Gwahoddwn y sawl sy’n ymwneud â gwaith deallusol mewn sefydliadau fel prifysgolion, a hefyd y sawl sy’n ymwneud â’r celfyddydau a’r cyfryngau yn broffesiynol, i rannu eu gwaith. Ni ddylai papurau fod yn fwy nag 20 munud o hyd, ond byddwn yn ystyried amrywiol amseroedd ar gyfer perfformiadau byr, dangosiadau a.y.b. Byddwn hefyd yn ystyried cynigion ar gyfer arddangosfeydd bychain. Croesewir hefyd gynigion ar gyfer paneli trafod cyflawn. Danfonwch gynigion o oddeutu 300 o eiriau (ar gyfer papurau unigol) ynghyd â bywgraffiad byr i'r cyfeiriad canlynol os gwelwch yn dda: e.price@abertawe.ac.uk ·Am ragor o wybodaeth ar Academi Hywel Teifi ewch i'w gwefan: http://www.abertawe.ac.uk/academihywelteifi · Am ragor o wybodaeth ar Brifysgol Abertawe, ewch i: www.swansea.ac.uk · Am ragor o wybodaeth am ddinas Abertawe, ewch i: www.visitswanseabay.com/ Edrychwn ymlaen i gael clywed gennych, i drefnu gyda chi, ac wrth gwrs, i gyd-drafod! |
| web site: http://www.abertawe.ac.uk/academihywelteifi |
| e-mail: e.price@abertawe.ac.uk |
Monday, January 9, 2012 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999