|
TAITH HAF ARAD GOCH YN DATHLU PENBLWYDD RALA RWDINS YN 30 OED! |
A hithau’n 30 mlynedd ers cyhoeddi cyfres ‘llyfrau Rwdlan’ gan Angharad Tomos mae Cwmni Theatr Arad Goch yn falch o gyhoeddi mai CERDYN POST O WLAD Y RWLA gan yr awdures ei hun fydd ein sioe haf ni am eleni! “Mae’r llyfrau yr un mor boblogaidd ag erioed ac yn ystod blwyddyn o ddathliadau mae hwn yn gyfle gwych i blant Cymru gwrdd â’i hoff gymeriadau wyneb yn wyneb mewn cynhyrchiad cyffrous ac egniol” Jeremy Turner, Cyfarwyddwr. Yn ystod y perfformiad bydd y gynulleidfa’n cael gwahoddiad i ymuno â Rala Rwdins, Strempan, Rwdlan, y Dewin Dwl, Llipryn Llwyd a Mursen y Gath ar eu gwyliau yng Ngwlad y Rwla. Ar ôl pacio’r sandalau a’r eli haul mae Rala Rwdins a’r criw yn hen barod i dorheulo ar y traeth....ond yn ôl yr arfer mae llond crochan o anturiaethau yn eu gwynebu a go brin y bydd cyfle i ymlacio! O fewn yr wythnosau nesaf bydd cast y sioe, Ffion Wyn Bowen, Nia Ann, Sion Trystan, Endaf Davies heb anghofio Mursen y Gath yn brysur yn ymarfer ar gyfer y daith. Bydd y cast yn perfformio 30 sioe mewn 16 ardal ar hyd a lled Cymru. “Mae’r ymateb i’r sioe wedi bod yn wych, mae dros 5,000 o docynnau wedi gwerthu hyd yma a nifer o sioeau wedi gwerthu allan! Mae ‘na gystadleuaeth arbennig iawn i’r rhai sy’n mynychu’r sioe eleni hefyd a chyfle i ennill gwyliau moethus i’r teulu yn rhodd gan Y Gorau o Gymru, a llun gwreiddiol gan Angharad Tomos! Mwy o newyddion am hyn yn fuan! ” Heulwen Davies, Swyddog Marchnata Arad Goch |
| AradGoch web site: www.aradgoch.org |
| Heulwen Ann Davies e-mail: heulwen@aradgoch.org |
Wednesday, March 20, 2013 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999