|
Sefydliad Garfield Weston yn cefnogi perfformiadau am ddim yng Nghanolfan Mileniwm Cymru |
Mae Sefydliad Garfield Weston wedi dyfarnu arian grant i Ganolfan Mileniwm Cymru er mwyn cefnogi'r gwaith o gynllunio, hyrwyddo a ffrydio'n fyw berfformiadau am ddim ar Lwyfan Glanfa. Ers i Ganolfan Mileniwm Cymru agor yn 2004, mae bron i 4000 o berfformiadau am ddim wedi bod ar Lwyfan Glanfa, gyda thros chwarter miliwn o bobl yn dod i wylio'r perfformiadau hyn. Mae'n cynnig llwyfan i artistiaid o wahanol oedrannau a genres - perfformwyr proffesiynol, newydd ac amatur fel ei gilydd - gael arddangos eu talent. Ym mis Chwefror eleni, lansiwyd Y Ganolfan: ar lwyfan, ar-lein, sef gwasanaeth ffrydio byw newydd sy'n galluogi pobl ledled y byd i wylio perfformiadau am ddim ar Lwyfan Glanfa. Ymddiriedolaeth deuluol sy'n rhoi grantiau yw Sefydliad Garfield Weston ac mae wedi bod yn cefnogi elusennau ledled y DU ers dros 50 mlynedd. Nod y sefydliad yw cefnogi sefydliadau sy'n cynnig atebion effeithiol i helpu'r sawl sydd fwyaf mewn angen ac, hyd yma, mae wedi rhoi mwy na £735 miliwn i lu o elusennau gwahanol. Mae ymddiriedolwyr y sefydliad yn parhau i fod yn ymrwymedig i gynnal ethos dyngarol y teulu Weston, sydd wedi ei wneud yn un o'r sefydliadau elusennol mwyaf ac uchaf ei barch yn y wlad. Dywedodd Marie Wood, Cyfarwyddwr Datblygu yng Nghanolfan Mileniwm Cymru: "Rydym yn hynod ddiolchgar i Sefydliad Garfield Weston, sydd wedi cefnogi'r Ganolfan o'r cychwyn, am ariannu ein rhaglen ryfeddol o berfformiadau am ddim ar gyfer y flwyddyn sydd i ddod. Drwy roi cyfle i ni lwyfannu'r rhaglen am ddim fwyaf o'i bath yn y DU, bydd y cymorth hwn yn ein helpu i feithrin perfformwyr talentog a chroesawu cynulleidfaoedd ac ymwelwyr i'n adeilad. Fel elusen, mae cefnogaeth gan y sector preifat yn rhan allweddol o fodel busnes y Ganolfan ac ar hyn o bryd rydym yn ceisio nawdd busnes a rhoddion unigol er mwyn parhau â'r rhaglen ar ôl hydref 2014, yn ogystal â chefnogi gweithgareddau addysgol ac allgymorth helaeth y Ganolfan" Dywedodd Philippa Charles, Cyfarwyddwr Sefydliad Garfield Weston, "Mae'r teulu Weston yn falch o gefnogi'r Ganolfan drwy ariannu Rhaglen Perfformiadau Am Ddim Garfield Weston unwaith eto. Rydym yn cefnogi elusennau o bob maint ledled Cymru, ac rydym yn awyddus i annog mwy o geisiadau gan sefydliadau yng Nghymru." Yr wythnos hon, perfformiodd myfyrwyr o Academi Llais Ryngwladol Cymru ar Lwyfan Glanfa fel rhan o gyngerdd Y Nadolig gyda Dennis O’Neill a Chyfeillion. Dywedodd Dennis O'Neill, Cyfarwyddwr Academi Llais Ryngwladol Cymru: "Mae Llwyfan Glanfa yn syniad sy'n rhyfeddol o anghyffredin a dychmygus. Nid yn unig y mae ei ddigwyddiadau cyn perfformiadau yn ychwanegu at yr awyrgylch yn gyffredinol, ond mae ei berfformiadau amser cinio yn ehangu rôl Canolfan Mileniwm Cymru fel lleoliad byw, cymdeithasol ar gyfer y cyhoedd, p'un a ydynt yn mynd i'r theatr ai peidio. Gellir dadlau mai swyddogaeth bwysicaf Llwyfan Glanfa yw rhoi cyfle i berfformwyr a grwpiau amrywiol gyflwyno eu hunain beth bynnag fo'u diddordeb - cerddoriaeth o bob math, amatur, myfyrwyr a pherfformwyr proffesiynol. Unwaith eto, cyswllt hanfodol rhwng y gymuned a theatr. Hir oes iddo!" Mae rhestrau llawn o berfformiadau am ddim ar gael yn www.wmc.org.uk neu gallwch wylio perfformiadau'n fyw drwy Y Ganolfan: ar lwyfan, ar-lein yn www.wmc.org.uk/makeityours/TheCentreConnected Mae Sefydliad Garfield Weston yn croesawu elusennau sydd â diddordeb, yn enwedig rhai sy'n gweithio er lles pobl ifanc a chymunedau, neu'n gweithio ym maes lles, i ymweld â'i gwefan, www.garfieldweston.org |
| Canolfan Mileniwm Cymru web site: www.wmc.org.uk/makeityours/TheCentreConnected |
| e-mail: |
Friday, December 6, 2013 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999