|
Hwyl am ddim i'r teulu cyfan bob dydd Sadwrn yng Nghanolfan Mileniwm Cymru |
Yr hanner tymor hwn, bydd Canolfan Mileniwm Cymru yn lansio ‘Clwb Milipwts’, sef rhaglen gyffrous o weithgareddau wythnosol i'r teulu cyfan bob dydd Sadwrn. O 24 Mai 2014, ymunwch â'r Milipwts - Ogi, Lecsi, Ponti a Dyfi - cymeriadau Canolfan Mileniwm Cymru sydd wrth eu boddau â diwylliant, wrth iddynt rannu eu brwdfrydedd am lenyddiaeth, dawns, cerddoriaeth a theatr drwy amrywiaeth o weithgareddau a gweithdai am ddim. Bydd Clwb Milipwts, a ysbrydolwyd gan fyd y celfyddydau perfformio, sioeau sy'n ymweld â'r Ganolfan a digwyddiadau diwylliannol cenedlaethol a rhyngwladol, yn rhoi cyflwyniad llawn hwyl i blant i fyd cyffrous y celfyddydau a diwylliant. Gan ddechrau ddydd Sadwrn 24 Mai, bydd Clwb Milipwts yn dathlu'r Gwanwyn gyda chymeriad Dyfi, malwoden sydd wrth ei bodd â gwisgo i fyny a pherfformio. Bydd gweithgareddau'r diwrnod yn seiliedig ar thema'r gwanwyn, ac fel rhan o ŵyl y Gwanwyn Cymru gyfan, sy'n dathlu creadigrwydd mewn blynyddoedd hŷn, mae'r Ganolfan yn annog plant i ddod â'u neiniau a'u teidiau am ddiwrnod o gyfansoddi caneuon, crefftau a dull Henna o baentio dwylo. Byddwn hefyd yn dathlu gŵyl y Gwanwyn ddydd Sadwrn 31 Mai gyda gweithgareddau wedi'u hysbrydoli gan Ogi, y chwilen ddoeth sy'n ymddiddori mewn llyfrau. Bydd digonedd o amser i adrodd straeon a darllen llyfrau, ynghyd â 'choeden gofio' hudol, lle y gall plant blannu eu hoff atgofion. Ar 21 Mehefin, bydd Ogli yn dychwelyd i ddathlu Wythnos y Ffoaduriaid gyda rhagor o straeon, barddoniaeth a map enfawr o'r byd i'w archwilio. Ymhlith uchafbwyntiau eraill y rhaglen wythnosol bydd diwrnod ar thema War Horse ar 28 Mehefin yn llawn o bypedau ac wedi'i ysbrydoli gan gymeriad Lecsi, sy'n dipyn o ddawnswraig. Ar 23 Awst, bydd Ponti, y chwilen sy'n dwli ar dechnoleg a cherddoriaeth yn ymuno â ni mewn gweithdai bod yn DJ er mwyn dathlu Berw'r Bae. Dywedodd Louise Miles-Crust, Pennaeth Rhaglennu yng Nghanolfan Mileniwm Cymru: "Mae'n bleser gennym allu ymestyn arlwy'r Ganolfan i'r teulu i gynnwys diwrnod o weithgareddau am ddim bob wythnos, gan helpu i sicrhau mai'r Ganolfan yw'r lle perffaith i ymweld ag ef gyda'r plant ar y penwythnos. Mae ein hardal gweithgareddau sy'n addas i blant, Cartre'r Milipwts, wedi bod yn llwyddiant ysgubol ac mae'n ffordd wych o ennyn diddordeb plant bach ym myd y celfyddydau perfformio. Mae'n wych ein bod bellach yn gallu ymestyn ein harlwy i'r teulu gyda rhaglen llawn hwyl a chyffrous o weithdai a gweithgareddau i ennyn diddordeb plant ymhellach yn y celfyddydau. Cynhelir ‘Clwb Milipwts’ bob dydd Sadwrn yng Nghanolfan Mileniwm Cymru o 24 Mai 2014. I gael rhagor o wybodaeth, ewch i http://www.wmc.org.uk/makeityours/families/?lang=cy-GB |
| Canolfan Mileniwm Cymru web site: www.wmc.org.uk/makeityours/families/?lang=cy-GB |
| e-mail: |
Wednesday, May 21, 2014 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999