|
Canolfan Mileniwm Cymru yn cyflwyno addasiad newydd o’r clasur Almaenaidd Man to Man fis Mawrth 2015 |
Bydd Canolfan Mileniwm Cymru yn cyflwyno fersiwn newydd o Man to Man ym mis Mawrth 2015, y cynhyrchiad llawn mewnol cyntaf o dan gyfarwyddyd artistig newydd Graeme Farrow. Wedi'i gyfieithu a'i addasu o gampwaith Manfred Karge 'Jacke wie Hose' gan Alexandra Wood, bydd y cynhyrchiad yn ail-ddychmygu'r sioe un ferch fel darn dwys a meistrolgar o theatr gorfforol. Ar ôl i'w gŵr farw, mae Ella Gericke yn cymryd ei enw ac yn parhau i weithio yn ei swydd fel gweithredwr craen er mwyn goroesi'r Almaen Natsïaidd. Gan beryglu ei hunaniaeth ei hun er mwyn goroesi, mae Ella yn plymio i fyd gwrywaidd newydd llawn cwrw, schnapps a phocer; bodolaeth clawstroffobig a chaiff ei rheoli gan yr ofn o gael ei darganfod ac awdurdod ar ei newydd wedd yn yr Almaen anwadal yn yr ugeinfed ganrif. Wrth ailwampio'r campwaith Almaeneg gwreiddiol yn ddarn personol a hollgynhwysol o theatr gorfforol, mae Man to Man yn wynebu erchyllterau’r Ail Ryfel Byd o safbwynt unigryw a hynod bersonol. Ysgrifennwyd y fersiwn newydd gan y dramodydd ifanc cyffrous, Alexandra Wood, gyda Margaret Ann Bain fel Ella, ac mae Man to Man wedi'i chyfarwyddo gan Bruce Guthrie, (Cyfarwyddwr Cyswllt i Sam Mendes ar ei daith fyd-eang o Richard III, cyfarwyddwr Twelfth Night ac Othello, ar gyfer y Singapore Repertory Theatre), ochr yn ochr â thîm creadigol gwych gan gynnwys Scott Graham o'r cwmni theatr corfforol blaenllaw Frantic Assembly. Dywedodd Cyfarwyddwr Artistig Canolfan Mileniwm Cymru, Graeme Farrow: "Mae Man to Man Manfred Karge yn cynnig safbwynt unigryw ar hanes yr Almaen gyda chymysgedd anhygoel o farddoniaeth, rhyddiaith, realaeth a hud. Mae tîm artistig gwych yn gweithio arni gan gynnwys y berfformwraig gorfforol hynod dalentog Margaret Ann Bain. Ein nod yw cynhyrchu gwaith beiddgar a thrawiadol fel hwn yng Nghymru a mynd ag ef i'r byd. Mae Man to Man yn lle da i ddechrau.' Gan drafod yr addasiad newydd, dywedodd y cyfarwyddwr Bruce Guthrie: ‘ Mae Man to Man yn wahanol iawn i’r dramâu rydw i wedi’u cyfarwyddo o’r blaen. Mae’n episodaidd – mae Ella yn ail-fyw cyfres o atgofion ac, o’r dechrau, roeddwn i’n teimlo bod y sgript wreiddiol yn wirioneddol gymhellol. Bydd yr addasiad yma’n ceisio mynd â’r gynulleidfa ar siwrnai synhwyraidd yn hytrach nag un storïol. Gobeithio y byddwn yn llwyddo i ddeffro gwahanol ymatebion gan y gynulleidfa yn seiliedig ar y gyfres o atgofion sy’n cael ei harchwilio. ‘Mae’n ddrama ryfeddol a byddwn ni’n defnyddio nifer o wahanol dechnegau i sefydlu iaith a pherthynas gyda’r gynulleidfa er mwyn mynd â nhw ar siwrnai gyda’r cymeriad: taflunio, goleuo, y ffordd rydyn ni’n rhyngweithio â’r set a gyda’r gynulleidfa, neu natur gorfforol y darn. Mae’r cyfan ar gael gan fod y testun mor gyfoethog a’r atgofion mor gryf. Mae’n mynd i fod yn gyffrous iawn.’ Cafodd fersiwn wreiddiol Manfred Karge o'r ddrama, 'Jacke wie Hose', ei llwyfannu'n am y tro cyntaf yn y Scgauspeilhaus Bocehum yn 1982. Cafodd ei chyfieithu am y tro cyntaf gan Anthony Vivas ac fe'i perfformiwyd yn y DU o dan y teitl Saesneg Man to Man, gyda Tilda Swinton yn chwarae rhan Ella Gericke. Mae Man to Man yn rhan o WOW Caerdydd, gŵyl sy'n dathlu, herio ac yn mynegi cyflawniadau, trafferthion a heriau i ferched yn y dyfodol ac fe'i cynhelir ym mis Mawrth 2015. Mae Man to Man yng Nghanolfan Mileniwm Cymru rhwng 20 a 27 Mawrth 2015, (rhag-berfformiad 19 Mawrth 2015) Mae tocynnau'n £14, rhag-berfformiad, £9. I gael rhagor o wybodaeth ac i archebu tocynnau, ewch i www.wmc.org.uk neu ffoniwch y swyddfa docynnau ar 029 2063 6464. |
| web site: www.wmc.org.uk |
| e-mail: |
Friday, December 19, 2014 |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999