|
Mae Sgript Cymru wedi derbyn gwobrau Cynhyrchiad Saesneg Gorau ac Actor Gorau am y cynhyrchiad hynod o lwyddiannus o Life of Ryan ...and Ronnie gan Meic Povey. Enillodd Aled Pugh y wobr am Actor Gorau am ei berfformiad hudol o Ryan. Cyflwynir y gwobrwyon gan wefan Theatr yng Nghymru, sy’n gyrchfan a man trafod amhrisiadwy ar gyfer y Celfyddydau. Gan ennyn cynulleidfaoedd mawr ac adolygiadau rhagorol, profodd Life of Ryan ...and Ronnie yn llwyddiant ysgubol i Sgript Cymru. Roedd y sioe yn berfformiad epig oedd yn cynnwys siwtiau o’r 70au, crysau â choleri fflêrs a theis bo melfed. Gydag anwyldeb, gonestrwydd a rhywfaint o gabaret, dilynodd drama Meic Povey uchafbwyntiau a dyfnderoedd y ddau ddiddanwr gan ddiweddu ar y noson y caeodd y llenni ar y ddau am y tro olaf. Roedd Simon Harris, Cyfarwyddwr Artistig Sgript Cymru a Chyfarwyddwr Life of Ryan …and Ronnie wrth ei fodd gyda’r gwobrwyon. “Dyma’r nawfed tro mewn pum mlynedd i Sgript Cymru ennill gwobr Theatr yng Nghymru, ond mae hon yn wobr arbennig. Mae’n bleser o’r mwyaf i dderbyn gwobr Cynhyrchiad Saesneg Gorau gan ei fod yn cydnabod pob elfen o Life of Ryan …and Ronnie - set, goleuo, cyfarwyddo, perfformio a sgript. Rhannir llwyddiant y cynhyrchiad gan bawb oedd yn ymwneud â hi - o’r gweinyddwyr a’r criw i’r tîm cynhyrchu - fe ysbrydolwyd pob un ohonyn nhw gan ddrama swynol Meic Povey.” Ychwanegodd: “Dwi hefyd yn hynod o falch bod Aled Pugh wedi ennill y wobr Actor Gorau am ei berfformiad o Ryan, ond Aled fyddai’r cyntaf i gydnabod ei gyd-actor, Kai Owen. Gwnaeth y cyfuniad o’i talentau gynorthwyo iddyn nhw greu act dwbl rhagorol.” Rhwng Tachwedd a Rhagfyr 2005, teithiodd y cynhyrchiad unarddeg o Theatrau, gan gynnwys Canolfan Mileniwm Cymru a Theatr y Cochrane yn Llundain. Cafwyd ymateb ffantastig ym mhob un o’r canolfannau a llawer yn teimlo y gwnaeth y ddau lwyddo i bortreadu'r ddau gomedïwr mor driw i'w cymeriadau. Roedd Aled Pugh, a gafodd ei ganmol gan yr actor enwog Philip Madoc am ei bortread o Ryan, wrth ei fodd pan glywodd y newyddion: “Roedd e’n grêt i ennill Actor Gorau ond rhan o’r rheswm y bu’r sioe mor llwyddiannus oedd y bartneriaeth rhyngof i a Kai. O’r dechrau roedd yna swyn, ac roedd yn ffantastig i rhannu llwyfan gyda ef ac roedd pob un perfformiad yn ffres a gwahanol” Dywedodd Aled, a oedd yn ffan mawr o waith Ryan cyn y sioe, i'r cynhyrchiad wneud iddo deimlo’n agosach fyth at y seren. “Dwi’n fwy fyth o ffan o Ryan nawr. Fe wnaeth y cynhyrchiad alluogi fi i gael gwell dealltwriaeth o’r person yn hytrach na’r perfformiwr. Roedd e’n brofiad ffantastig.” Mae Sgript Cymru yn hynod o falch o lwyddiant y sioe ac yn ddiolchgar bod cynulleidfaoedd wedi mynd i'r drafferth i ddangos eu gwerthfawrogiad drwy bleidlais yn ogystal â thrwy gymeradwyaeth. |
| Sgript Cymru web site: www.sgriptcymru.com |
| e-mail: |
Friday, February 10, 2006 |
|
Other related news stories on the Theatre in Wales web site : |
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999