|
Jason Donovan yn serennu yn Priscilla Queen of the Desert yng Nghanolfan Mileniwm Cymru
|
Bydd Jason Donovan yn ailgydio yn rôl Tick yng nghynhyrchiad teithiol PRISCILLA QUEEN OF THE DESERT wrth iddo ymweld â Chanolfan Mileniwm Cymru flwyddyn nesaf. Mae David Ian Productions ac Ambassador Theatre Group wrth eu bodd o gyhoeddi bod y sioe gerdd sy’n hynod lwyddiannus dros y byd PRISCILLA QUEEN OF THE DESERT yn cael ei pherfformio yng Nghanolfan Mileniwm Cymru o 7 – 18 Ionawr 2014.
Bydd JASON DONOVAN yn dod yn ôl at rôl Tick, sef y rhan a chwaraeodd pan gafodd y sioe ei première yn West End Llundain. Y llynedd, cyrhaeddodd Jason rownd derfynol ‘Strictly Come Dancing’. Mae wedi cael gyrfa hynod lwyddiannus ac amrywiol fel actor ac fel artist recordio byd-eang sydd wedi gwerthu dros 13 miliwn albwm hyd heddiw. Yn ogystal â “Priscilla Queen of the Desert”, mae ei gredydau West End yn cynnwys y brif ran yn “Joseph and the Amazing Technicolor Dreamcoat” a Caractacus Potts yn “Chitty Chitty Bang Bang”. Mae Jason hefyd wedi bod ar daith fel Capten Von Trapp yn “The Sound of Music”, Frank N Furter yn “The Rocky Horror Show”, y brif ran yng nghynhyrchiad John Doyle o “Sweeney Todd” gan Stephen Sondheim ac, ar hyn o bryd, gallwch ei weld fel yr Artilleryman yn “The War of the Worlds”. Mae ei gredydau teledu yn cynnwys “Neighbours” ac “Echo Beach”. Roedd Jason hefyd yn ffeinal y gyfres deledu lwyddiannus “I’m A Celebrity Get Me Out Of Here!” ar ITV.
Yn seiliedig ar y ffilm boblogaidd, mae sioe gerdd PRISCILLA QUEEN OF THE DESERT yn sôn am antur ysbrydoledig a chalonogol tri ffrind sy'n mynd ar daith ar hen fws rhydlyd yn chwilio am gariad a chyfeillgarwch ac yn dod o hyd i fwy nag y gwnaethant fyth freuddwydio amdano.
Gydag amrywiaeth ysblennydd o wisgoedd beiddgar a llu o ganeuon adnabyddus gan gynnwys ‘It’s Raining Men’, ‘Say a Little Prayer’, ‘Go West’, ‘Hot Stuff’ ac ‘Always on My Mind’, mae'r sioe gerdd newydd hynod wreiddiol a doniol hon yn eich tywys ar daith eithriadol.
Mae’r cast yn cynnwys RICHARD GRIEVE sydd yn chwarae’r rhan Bernadette ar ôl chwarae rhan Tick yn flaenorol yn y cynhyrchiad o'r sioe yn y West End. Fwy na thebyg ei fod yn fwyaf adnabyddus fel Jonny Foster yn "Emmerdale". Yn hanu'n wreiddiol o Awstralia, chwaraeodd ran Sam Kratz yn “Neighbours” a Dr Lachlan Frazer yn “Home and Away”. Mae ei rolau theatr yn y DU yn cynnwys taith genedlaethol “Footloose - The Musical” a “Bells Are Ringing” yn yr Unicorn Theatre. Mae ei rolau theatr yn Awstralia yn cynnwys Greg Connell yn “The Boy from Oz” a “How to Succeed in Business Without Really Trying”.
GRAHAM WEAVER fydd yn chwarae rhan Felicia, sef y rhan a chwaraeodd yn y cynhyrchiad o'r sioe yn y West End. Mae ei rolau theatr eraill yn cynnwys Mary Sunshine yn "Chicago" ac "Assassins". Mae rhagor o'r cast i gael eu cyhoeddi.
Agorodd PRISCILLA QUEEN OF THE DESERT yn wreiddiol yn Awstralia yn 2006 a pharhaodd ar y llwyfan am ddwy flynedd cyn agor yn y West End am gyfnod pellach o ddwy flynedd. Yn ddiweddar, cafodd y sioe lwyddiant ysgubol ar Broadway. Dros y blynyddoedd, mae wedi ennill sawl gwobr gan gynnwys gwobrau clodwiw Olivier a Tony am y Gwaith Dylunio Gwisgoedd Gorau.
Mae tocynnau ar gyfer PRISCILLA QUEEN OF THE DESERT yn amrywio o £15 i £60. Canllaw oedran 15+. I archebu tocynnau neu i gael rhagor o wybodaeth, ewch i www.wmc.org.uk neu ffoniwch 02920 63 6464. |
web site: |
e-mail: |
Wednesday, August 21, 2013 |
|
|
|
|
Older news
stories have been carefully archived.
2006 | 2005 | 2004 | 2003 | 2002 | 2001 | 2000 | 1999
